काठमाडौं – अनेकौं कारण देखाउँदै मेलम्ची खानेपानी आयोजनाको काममा भाका सार्दै आएका सरकारले फेरी पनि भाका सारेको छ ।

खानेपानी मन्त्री बीना मगरले दशैंअघि मेलम्चीको पानी काठमाडौंमा ल्याउने बताएको एक साता नबित्दै मेलम्ची खानेपानी आयोजनाले यसअघि निर्धारित समयावधिमा मेलम्चीको काम नसकिने जनाएको हो ।

कोरोना भाइरस (कोभिड १९) संक्रमण फैलन नदिन सरकारले देशभर ‘लकडाउन’ गरेपछि आयोजनाको काम पनि ठप्प भएकाले दशैंअघि मेलम्चीको पानी काठमाडौंमा नआउने आयोजनाले प्रष्ट्याएको छ ।

मुलुक लकडाउनमा गएपछि सबै काम ठप्प भएकाले पूर्बनिर्धारित समयावधिमा काम हुन नसक्ने आयोजनाका कार्यकारी निर्देशक तिरेशप्रसाद खत्रीले जानकारी दिए ।

एक साताअघि मात्रै मेलम्ची खानेपानी आयोजनाको सुरुङमा पानी हालेर पहिलो परीक्षण सम्पन्न भएपछि यसपटक आउँदो दशैंभित्र मेलम्चीको पानी काठमाडौंमा आउने अपेक्षा गरिएको थियो ।