काठमाडौं – कोरोनाको आशंकामा कान्ति बाल अस्पताल को आइसोलेसनमा आइतबार भर्ना भएका एक बालकको कोरोना परीक्षणको रिपोर्ट नेगेटिभ आएको छ । 

अस्पतालले सोमबार बालकको स्याम्पल परीक्षणका लागि टेकुस्थित राष्ट्रिय जनस्वास्थ्य प्रयोगशालामा पठाएको र आज बिहान रिपोर्ट नेगेटिभ आएको जानकारी प्राप्त भएको अस्पतालका निर्देशक डाक्टर कृष्ण पौडेलले जनाकारी दिए ।

डा पौडेलका अनुसार बालकको कोरोना परीक्षणको रिपोर्ट नेगेटिभ आएपनि बालकलाई निमोनिया देखिएकाले आइसोलेसन वार्डबाट अन्य वार्डमा सिफ्ट गरेर निमोनियाको उपचार गरिएको छ ।

बालकको बुबा केही समयअघि दुवईबाट आएको र बुबासँग सम्पर्कमा रहेपछि बालकलाई स्वास्थ्य समस्या देखिएको भन्दै उनीहरु अस्पतालमा आएका थिए । बालकको उमेर ४ वर्षको रहेको छ ।

डा पौडेलेका अनुसार कोरोनाको आशंकामा नै कान्ति बाल अस्पपताको आइसोलेसनमा ४ जना  रहेका छन् । 

उनीहरुमध्ये २ जना सोमबार अस्पताल भर्ना भएका थिए । उनीहरुको कोरोना परीक्षणको रिपोर्ट आज साँझसम्म आउने पौडेलको भनाइ छ ।

 यस्तै कोरोनाकै आशंकामा अन्य दुईजना थपिएका छन् उनीहरुको भने थ्रोड स्वाब संकलन गर्न बाँकी रहेको अस्पतालले जनाएको छ ।