काठमाडौं – यतिबेला सरकारले गरेको ‘लकडाउन’ ले गर्दा कलाकारहरु फुर्सदमा छन् । कतिले घरमा परिवारका साथ समय बिताइरहेका छन् भने कतिले अन्य काम गरिरहेका छन् । अभिनेता दीपकराज गिरी पनि सेल्फ क्वारेनटाइनमा बसेका छन् ।

यता घरमा बस्दा आत्तिनेहरुका लागि दीपकराज गिरीले योगा र प्राणायाम सिक्न सुझाव दिएका छन् । उनले सामाजिक सञ्जालमा लेखेका छन्, ‘घरमा एकछिन बस्न नसक्ने, चञ्चल मन भएका मान्छेहरुलाइृ विस्तारै मानसिक समस्या उत्पन्न हुन सक्छ ।’

गिरीले मानसिक समस्या उत्पन्न हुनसक्ने भन्दै ध्यान गर्न सुझाव दिएका हुन् ।

‘युट्युबमा जानुस् प्राणायाम र योग सिकनुस्, शरीरलाई लाग्ने कोरोनालाई लकडाउन,’ गिरी लेख्छन्, ‘मन र मष्तिष्कमा लाग्ने कोरोनालाई बसाल्नुस् र योगा गर्नुस् ।’

सरकारले मंगलवारदेखि कोरोना भाइरसको संक्रमण कम होस् भनेर देशैभर निषेधाज्ञा जारी गरेको छ । सरकारले गरेको निषेधाज्ञाले गर्दा धेरै नेपाली घरमै थन्किएर बसेका छन् ।