झापा – नेपाल सरकारले कोरोना भाइरस भित्रिने जोखिम कम गर्न सरकारले सीमानाका बन्द गर्नअघि पूर्वीनाका काँकडभिट्टाबाट ५ सय भन्दा बढी भारतीय नागरिक भारत फर्किएका छन् ।

इलाका प्रहरी कार्यालय काँकडभिट्टाका प्रहरी नायब उपरीक्षक राजेन्द्र पोखरेलले आज बिहान ८ बजेसम्ममा ५०० भन्दा बढी भारतीयहरु काँकडभिट्टा नाकामा जाँच गराएर पश्चिम बङ्गालतर्फ गएको जानकारी दिए ।

आजै बिहान भारतबाट एक सय जना जति नेपाली पनि नेपाल प्रवेश गरेका छन् ।

आइतबार भारतमा जनता कर्फ्यू लगाइएका कारण भारत जान नपाएकाहरु आज बिहानैदेखि काँकडभिट्टाबाट भारत गएका हुन् ।

नेपालका कलकारखानामा मजदुरी गर्न, व्यापार व्यवसाय गर्न र घुमफिरका लागि आएका भारतीय नागरिकहरु नाका बन्द हुनुअघि नै भारत प्रवेश गर्ने भन्दै काँकडभिट्टामा जम्मा भएका हुन् ।

विगत तीन सातामा काँकडभिट्टा नाका भएर नेपालमा ८५ हजार र नेपालबाट भारततिर ८१ हजार जनाले कोरोना हेल्थ डेस्कमा स्वास्थ्य जाँच गराएर आउजाउ गरेको समेत प्रहरी नायब उपरीक्षक पोखरेलले बताउनुभयो ।