काठमाडौं– कोरोना भाइरसको जोखिमबाट जोगिनका लागि आइतबार भारतमा जनता कर्फ्यू लागू हुँदैछ । प्रधानमन्त्री नरेन्द्र मोदीको घोषणा अनुसार आइतबारका दिन जनता कर्फ्यू लागू हुने भएको हो ।

भारत सरकारले कोरोना भाइरसविरुद्ध सचेतना जगाउन भारतीय नागरिकलाई घरबाहिर ननिस्की सरकारको निर्देशनको पालना गर्न आग्रह गरेको छ ।

सरकारले मानिसहरुलाई आइतबारका दिन अत्यन्त जरुरी नपरी घरबाहिर ननिस्कन भनेको छ । त्यस्तै, भारत सरकारले बृद्धबृद्धालाई घरमै बस्न समेत आग्रह गरेको छ । सरकारले साँझ ५ बजे ५ मिनेटसम्म ताली बजाएर अरुको सेवामा अहोरात्र खटिरहनेको सम्मान गर्न समेत नागरिकहरुसमक्ष आह्वान गरेको छ ।

त्यस्तै, मानिसहरुलाई जनता कर्फ्यूका बेला जथाभावी सामान नकिन्न पनि आह्वान गरिएको छ । कार्यालयमा उपस्थित नहुने कामदारको तलब नकाट्न पनि भारत सरकारले रोजगारदातासमक्ष आह्वान गरेको छ । मानिसहरुलाई हल्लाबाट टाढै रहन र जनता कफ्यूबारे सरकारले जारी गरेको निर्देशनको पूर्ण पालना गर्न पनि सरकारले आग्रह गरेको छ ।

भारतमा हालसम्म २८३ जनामा कोरोना भाइरसको संक्रमण पुष्टि भएको छ भने ५ जनाको कोरोना भाइरसका कारण मृत्यु भइसकेको छ ।