काठमाडौं- सत्तारुढ दल नेपाल कम्युनिष्ट पार्टी (नेकपा) का अध्यक्ष पुष्पकमल दाहाल ‘प्रचण्ड’ माथि जुत्ता प्रहारको प्रयास गर्ने रतन तिरुवा धरौटीमा रिहा भएका छन् ।

काठमाडौं जिल्ला प्रशासन कार्यालयले पाँच सय रुपैयाँ धरौटीमा तिरुवालाई रिहा गरेको हो । रिहाईपछि पत्रकार महासंघका केन्द्रीय सदस्य जन्मदेव जैसीले तिरुवाको जिम्मा लिएका छन् ।

गत फागुन १८ गते काठमाडौंको राष्ट्रिय सभागृहमा आयोजित कार्यक्रममा तिरुवाले प्रचण्डमाथि जुत्ता प्रहारको प्रयास गरेका थिए ।

भरतमोहन स्मृति प्रतिष्ठानको आयोजनामा भएको उक्त कार्यक्रममा प्रमुख अतिथिका रुपमा सहभागी भएका प्रचण्डलाई जुत्ता प्रहारको प्रयास गरेपछि तिरुवालाई प्रहरीले पक्राउ गरेको थियो ।