काठमाडौं- नेपाल भारत सीमा समस्या समाधानको माग राख्दै खानेपानी मन्त्री बिना मगरले भूमि व्यवस्था, सहकारी तथा गरिबी निवारण मन्त्री पद्मा अर्याललाई ज्ञापनपत्र बुझाएकी छन् ।

मन्त्री मगरको अगुवाइमा कञ्चनपुरका स्थानीय तह र त्यहाँका संघीय संसदका जनप्रतिनिधिहरुले मन्त्री अर्याललाई ६ बुँदे ज्ञापनपत्र बुझाएका हुन् ।

ज्ञापनपत्रमा नेपालको भूमि मिचिएको विषयमा पुनरावलोकन गर्न माग गरिएको छ । यसैगरी सीमा क्षेत्रका भत्किएका र गायब भएका पिल्लरहरूलाई पुरानै ठाउँको तत्काल पुर्नस्थापना गरिनुपर्ने, अतिक्रमित जमिन फिर्ता गरिनुपर्ने लगायतका माग राखिएका छन् ।

केन्द्रबाट नै संसदीय टोली पुगेर स्थलगत रुपमा छानबिन गर्न उनीहरुले माग गरेका छन् । ज्ञापनपत्र बुझ्दै मन्त्री अर्यालले सीमा बचाउन सीमामा बस्ती बसाउने योजना अगाडि ल्याउनुपर्ने बताइन् ।

उनले प्राप्त विवरणहरुको अध्ययन गरेर राजनीतिक सहमति गरेर सहमतिअनुसार नापजाँच गर्ने कुरामा पहलकदमी लिइने बताइन् ।

उनले भनिन्, ‘यो डकुमेन्टको हामी अध्ययन गर्छौ । राजनीतिक सहमति अनुसार नापजाँच गर्ने कुरामा पहलकदमी थाल्नेछौं।’