काभ्रे– काभ्रेमा टिप्परको ठक्करबाट आमा र बच्चाको मृत्यु भएपछि आक्रोशित स्थानीयले पनौती बसपार्कमा अवरोध गरेका छन् ।

उनीहरुले क्षतिपूर्तिसहित टिप्पर चालकलाई कारबाहीको माग राख्दै विरोध प्रदर्शन गरेका हुन् । स्थानीयको अवरोधका कारण सवारी साधन चल्न सकेका छैनन् । उनीहरुले टायर बालेर सडक अवरुद्ध गरेका छन् ।

सोमबार बा ५ ख ५४८० नम्बरको टिप्परले पनौती बसपार्कमा खानिखोला गाउँपालिका १ की २७ वर्षीया जुनीमाया गोले र उनकी नाबालिका छोरीलाई ठक्कर दिँदा उनीहरु गम्भीर घाइते भएका थिए ।

उनीहरुको उपचारका क्रममा शिर मेमोरियल अस्पतालमा निधन भएको थियो । टिप्परका चालक रोशी गाउँपालिका ६ का नबराज थापालाई प्रहरीले नियन्त्रणमा लिएर आवश्यक अनुसन्धान जारी राखेको छ ।