वाशिंटन डीसी– विश्वव्यापी महामारीको रुप लिएको कोरोना भाइरस (कोभिड–१९) को संक्रमणबाट बच्न विश्वभर उच्च सतर्कता अपनाउन थालिएको छ ।

कोरोना भाइरसको संक्रमणबाट बच्न चिकित्सकहरुले एक–अर्काको प्रत्यक्ष सम्पर्कबाट टाढै रहन भनेका छन् । चिकित्सकहरुका अनुसार दुई वा दुईभन्दा बढी व्यक्तिसँग हात मिलाउँदा, अंकमाल गर्दा कोरोना भाइरस छिट्टै सर्ने गर्छ ।

चिकित्सकहरुको यही सुझावलाई अवलम्बन गर्दै अहिले विश्वभरका नेताहरु महत्वपूर्ण भेटघाटमा पनि एक–अर्कासँग हात मिलाउँदैनन् । बरु पूर्वीय सभ्यताको अभिवादन शैली नमस्कार गर्छन् ।

अमेरिकी राष्ट्रपति डोनाल्ड ट्रम्पले आयरल्यान्डका प्रधानमन्त्री लिओ भराडकरसँगको भेटमा नमस्कार गरी अभिभावदन गरेका छन् ।

बिहीबार ओभलस्थित कार्यालयमा भएको भेटमा ट्रम्पले हात मिलाउन अस्वीकार गरी प्रधानमन्त्री भरडकरसँग नमस्ते गरी अभिवादन गरेका हुन् । लियो भरादकर भारतीय मूलका हुन् ।

‘हामीले आज हात मिलाएनौं । हामी एकअर्कालाई चिन्छौं र हामी के (अभिवादन गर्नेक्रममा) गर्न जाँदैछौं भन्यौं । यो अचम्मको अनुभव थियो ।’ ट्रम्पले भने ।

दुई नेताबीचको भेटवार्ताका क्रममा पत्रकारहरुले हात मिलाउन भनेका थिए । तर, दुबै नेताले हात जोडी एकले अर्कालाई अभिवादन गरे । हालै भारत भ्रमणमा गएका ट्रम्पका अनुसार उनले भारतमा कसैसँग पनि हात मिलाएका थिएनन्, नमस्कार मात्र गरेका थिए ।

ट्रम्पले जापानी शैलीमा झुकेर पनि अभिवादन गरेका थिए । ‘उनीहरु (भारतीय र जापानी) हामीभन्दा निकै अघि रहेछन् ।’ ट्रम्पले भने ।