काठमाडौं– क्यानडाका प्रधानमन्त्री जस्टिन ट्रुडोकी पत्नी सोफी ग्रेगोइरेलाई कोरोना भाइरसको संक्रमण देखिएको छ ।

पत्नी सोफीलाई कोरोना भाइरस संक्रमण भएपछि अब प्रधानमन्त्री ट्रुडोले पनि १४ दिन आइसोलेसनमा बस्नुपर्ने भएको छ ।

कोरोना संक्रमणको आशंकामा प्रधानमन्त्री ट्रुडो र उनकी पत्नी सोफी बिहीबारदेखि नै ‘सेल्फ आइसोलेसन’मा बसेका थिए । नमूना संकलन गरी परीक्षण गर्ने क्रममा ट्रुडोकी पत्नी सोफीमा कोरोना संक्रमण भएको देखिएको हो ।

प्रधानमन्त्री ट्रुडोलाई भने अहिलेसम्म कोरोना संक्रमणको लक्षण देखिसकिएको छैन । तर, चिकित्सकहरुले ट्रुडोलाई पनि आइसोलेसनमा बस्न सुझाव दिएका थिए ।

यद्यपि अहिले नै प्रधानमन्त्री ट्रुडोमा कोरोना संक्रमण भए नभएकोबारे परीक्षण गर्ने कुनै योजना नभएको क्यानाडाको प्रधानमन्त्री कार्यालयले जनाएको छ ।

प्रधानमन्त्री कार्यालयद्वारा जारी विज्ञप्तीमा ट्रुडोल प्रधानमन्त्रीका रुपमा गर्नुपर्ने सबै काम नियमित जस्तै गर्ने जनाइएको छ । ट्रुडोले सुक्रबार (स्थानीय समयानुसार) देशबासीका नाममा सम्बोधन गर्ने समेत जनाइएको छ ।

प्रधानमन्त्रीकी पत्नी सोफी २ दिन अगाडि मात्रै एक कार्यक्रममा सहभागी हुन लण्डन पुगेर फर्किएकी थिइन् । लण्डनबाट फर्किएपछि उनमा ज्वरो आउने, टाउको दुख्ने लगायतका लक्षणहरु देखिएका थिए ।