चितवन – चितवनमा कोरोना भाइरसका बिरामीलाई उपचारका लागि राख्न भरतपुर अस्पतालमा आइसोलेशन वार्ड (छुट्टै कक्ष) विस्तार गरी १९ पुर्‍याएको छ ।

अस्पतालमा विहिबार बसेको कोरोना रोग रोकथाम तथा नियन्त्रण समन्वय समितिको बैठकले पाँच शैया रहेको आइसोलेशन वार्डलाई १९ शैयाको बनाउने निर्णयसँगै कार्यान्वयनमा ल्याएको हो ।

अस्पतालमा आएका शङ्कास्पद बिरामीलाई सेवा दिन शैया थप गरिएको बताइएको छ । अस्पतालमा रहेको कोरोना आउट ब्रेक म्यानेजमेन्ट टिमलाई विस्तार गरी १३ सदस्यीय बनाइएको छ ।

अस्पतालका प्रमुख मेडिकल सुपरिटेण्डेन्ट डा.श्रीराम तिवारीका अनुसार लक्षण देखिएका बिरामीलाई छुट्टै कक्षमा राखी उपचार गर्ने व्यवस्था मिलाइएको छ ।

पछिल्लो १० दिनदेखि रुघाखोकी तथा ज्वरो आएको तथा कोरोना जोखिमयुक्त देशमा भ्रमण गरेर फर्किएको दुई हप्ता भएका व्यक्तिलाई अस्पतालले सेवा लिन सक्ने व्यवस्था मिलाएको छ ।