दिल्ली– पार्टी परीत्याग गरेका भारतीय कांग्रेस नेता ज्योतिरादित्य सिंधिया सत्तारुढ भारतीय जनता पार्टी भाजपा प्रवेश गरेका छन् ।

मंगलबार पार्टी परीत्याग गरेको घोषणा गरेका सिंधियाले बुधबार भाजपाका राष्ट्रिय अध्यक्ष जेपी नड्डाको उपस्थितीमा भाजपाको सदस्यता स्वीकार गरेका हुन् ।

मध्यप्रदेशका प्रभावशाली नेताका रुपमा लिइने उनले कांग्रेस पार्टी पहिलेजस्तो नरहेका कारण आफूले पार्टी परित्याग गर्नु परेको जनाए । उनले कांग्रस पार्टीले नया नेतृत्व एवं नयाँ विचारलाई नकारेका कारण आजको अवस्थामा आइपुगेको आरोप पनि लगाए ।

उनले मंगलबार एकाएक पार्टी परित्याग गरेको घोषणा गरेका थिए । पार्टी परित्याग गर्नुअघि उनले प्रधानमन्त्री नरेन्द्र मोदी र गृहमन्त्री अमित शाहसँग परामर्श लिएको भारतीय सञ्चारमाध्यमले जनाएका छन् ।

मध्यप्रदेशमा गत वर्ष भएको विधानसभा निर्वाचनयता सिन्धिया पार्टीप्रति असन्तुष्ट रहँदै आएका थिए । निर्वाचनमा जीत हासिल गरेपछि उनले त्यहाँ मुख्यमन्त्री पदको अपेक्षा गरेका थिए । तर, पार्टीले उनको स्थानमा कमलनाथलाई मुख्यमन्त्री बनाएको थियो ।

सिन्धियाले पार्टी परित्याग गरेलगत्तै उनीसँगै २२ जना विधायकले पार्टीबाट राजीनामा दिने बताइसकेपनि उनीहरुको राजीनामाबारे स्पष्ट खुलासा भइसकेको छैन ।

२२ विधायकले पार्टीबाट राजीनामा दिएको खण्डमा राज्यमा कांग्रेसको अवस्था कमजोर हुनसक्ने भरातीय सञ्चारमाध्यमको विश्लेषण छ ।