काठमाडौं– भारतबाट भागेका धनाढ्य व्यापारी नीरव मोदी बेलायतको राजधानी लण्डनमा पक्राउ परेका छन् । भारतीय अधिकारीको आग्रहमा नीरव मोदीलाई मंगलबार मध्य लण्डनको हेलबर्न क्षेत्रबाट पक्राउ गरिएको बेलायती प्रहरीले जनाएको छ ।

उनलाई लण्डनको वेस्टमिनिस्टर मजिस्टे«ट अदालतमा उपस्थित गराउने तयारी भइरहेको बताइएको छ ।

उनीमाथि राज्य सञ्चालित पन्जाब नेशनल बैंकमा २ अर्ब अमेरिकी डलर बराबरको ऋणमा ठगी गरेको अभियोग लागेको छ ।

उनी र उनका मामा मेहुल चोक्सीले पन्जाब नेशनल बैंकमा ठगी गरी बैंकलाई ग्यारेन्टी राखेर ऋण लिएको भारतीय अधिकारीले जनाएका छन् । ठगी प्रकरण सार्वजनिक भएपछि दुबैले भारत छाडेका थिए ।

गत अगस्ट महिनामा नीरव मोदीलाई पक्राउ गर्न भारतीय अधिकारीले बेलायती प्रहरीलाई आग्रह गरेका थिए । त्यसै अनुसार उनलाई पक्राउ गरिएको बताइएको छ ।

त्यसअघि गत डिसेम्बरमा बेलायतको अदालतले अर्का व्यापारी विजय माल्यालाई भारत सुपुर्दगी गर्न आदेश दिएको थियो । नीरव मोदीलाई पनि बेलायतले भारत सुपुर्दगी गर्नसक्ने बताइएको छ ।