काठमाडौं – प्रहरीले काठमाडौं जडिबुटीस्थित जागृति एकेडेमीकी शिक्षिका सीतालक्ष्मी कर्माचार्यलाई पक्राउ गरेको छ । कम अंक ल्याएका विद्यार्थीलाई हात काट्न लगाएको आरोपमा उनलाई पक्राउ गरिएको हो ।

काठमाडौं प्रहरी प्रमुख उत्तमराज सुवेदीले ती शिक्षिकालाई पक्राउ गरेको पुष्टि गरे । उनीमाथि अभ्रद वा अमानवीय यातनामध्ये कुनै एक विषयमा मुद्दा चलाउने प्रहरीले तयारी गरेको छ । वानेश्वर प्रहरी वृत्तले कर्माचार्यलाई नियमन्त्रणमा लिएको हो ।

ती शिक्षिकाले कक्षा ६ र ७ का विद्यार्थीलाई ब्लेडले हात चिर्न लगाएकी थिइन् । उनले परीक्षामा कम अंक ल्याउनेलाई हात काट्ने चेतावनी पहिले नै दिएकी थिइन् । शिक्षिकाको दबाबमा ३४ विद्यार्थीले ब्लेडले हात काटेका थिए ।

ब्लेडले हात काट्न लगाएको समाचार बाहिर आएपछि स्कूलले ती शिक्षिकालाई अवकाश दिएको जनाएको छ । ती शिक्षिकाले सामाजिक विषय पढाउँदै आएकी थिइन् ।

१२ वर्षदेखि सोही स्कूलमा पढाउँदै आएकी कर्माचार्यले पूर्णाङ्क २० मा १५ भन्दा कम अंक ल्याउने विद्यार्थीलाई ब्लेडले हात चिर्न लगाएर सजाय दिएकी थिइन् ।

प्रहरीले प्रारम्भिक बयानका क्रममा कर्माचार्यले गल्ती भएको स्वीकारेको जनाएको छ ।