काठमाडौं– नेपाली महिला टोलीले साफ च्याम्पियनसिपको पहिलो सेमिफाइनलमा बुधबार (आज) श्रीलंकाविरुद्ध खेल्दै छ । विराटनगरको शहीद मैदानमा बिहान ११ बजेदेखि सुरु हुने खेल हुनेछ ।

प्रतियोगितामा बलियो टोलीका रुपमा देखिएको नेपालले श्रीलंकामाथि सहज जितको खोजिमा रहेको छ । समूह चरणका दुवै खेलमा उत्कृष्ट प्रदर्शन गरेको नेपाल समूह विजेता बन्दै सेमिफाइनलमा पुगेको हो ।

मंगलबार सेमिफाइनल खेलबारे बोल्दै नेपाली टोलीका मुख्य प्रशिक्षक हरि खड्काले श्रीलंकामाथि जित निकाल्दै टोली फाइनल पुग्ने बताएका छन् । त्यस्तै कप्तान निरु थापाले पनि विपक्षीमाथि टोली हावी हुँदै फाइनल पुग्ने बताए ।

विपक्षी टोलीका लागि नेपालकी कप्तान निरु थापा, सावित्रा भण्डारी र मञ्जली योञ्जन लयमा देखिएका छन् । सेमिफाइनल खेल जित्दै फाइनल पुग्ने लक्ष्यमा रहेको नेपाली टोलीले घरेलु मैदानमा उपाधि उचाल्ने बताउँदै आएका छन् ।
त्यस्तै, आजै दिउँसो ३ बजे हुने अर्को खेलमा भारत र बंगलादेशले प्रतिस्पर्धा गर्दैछन् ।