काठमाडौं – अभिनेता तथा निर्माता दीपकराज गिरीले हलिउडको बहुप्रतीक्षित फिल्म ‘एभेन्जरः इन्ड गेम’ रिलिज हुने मितिमा रिलिज भइसकेको उनको फिल्म ‘छक्का पञ्जा २’ रिलिजको घोषणा गरेका छन् ।

वैशाख १३ गते रिलिज हुने भनिएको फिल्म ‘दाल भात तरकारी’ ले आफ्नो रिलिज मिति पछाडि सारेपछि यो मितिमा फिल्म ‘छक्का पञ्जा २’ लाग्ने भएको हो । यो मितिमा ठूला ब्यानरका भनिएका कुनै पनि फिल्म रिलिज नगरिए पनि हलिउड फिल्म ‘एभेन्जरः इन्ड गेम’ रिलिज हुने सम्भावना छ ।

किन जुधाए दीपकराजले फिल्म ?

मार्भल इन्टरटेनमेन्टको ब्यानरमा निर्माण भएको फिल्म ‘क्याप्टेन मार्भल’ पनि नेपालमा रिलिज गर्ने भनेर अन्तिम समयमा आएर रिलिज भएको थिएन । यस हिसाबले नेपालमा सोही ब्यानरको प्रतीक्षित फिल्म ‘एभेन्जरः इन्ड गेम’ पनि रिलिज नहुन सक्छ । यो त एकातिर छ नै, अर्कातिर हलिउडका ठूला फिल्मले मल्टिप्लेक्स हलमा मात्र ‘शो’ पाउने गर्छन् ।

मोफसलका प्रायः हल र काठमाडौंका सिंगल थिएटरमा पनि उक्त फिल्म लाग्ने छैन र ‘छक्का पञ्जा २’ रिलिज हुनेछ । यस अर्थमा दीपकराज गिरी एण्ड टिमले यो फिल्म पुनः रिलिज गर्दा फाइदा हुने देखेका छन् ।

अझ दीपक–दीपाले फिल्मबाट उठेको ठूलो रकम रवि लामिछानेले निर्माण गर्न लागेको विद्यालयलाई दिने घोषणा समेत गरेका छन् । यसले पनि दर्शकलाई यो फिल्म हेर्न प्रोत्साहित गर्ने पक्का छ ।

जे होस्, नयाँ फिल्म पनि हलमा दर्शक तान्न नसकिरहेको अवस्थामा दीपक–दीपाको ‘छक्का पञ्जा २’ फेरि चल्ने भएको छ । कथमकदाचित हलिउड फिल्म ‘एभेन्जरः इन्ड गेम’ नेपालमा रिलिज भएन भने दीपक–दीपालाई झनै फाइदा हुने पक्काजस्तै छ ।