काठमाडौं – एसीसी इस्टर्न रिजन टी-ट्वान्टी कप क्रिकेटमा नेपालले अहिले आफ्नो पहिलो खेलमा मलेसियासँग प्रतिस्पर्धा गर्दैछ ।

थाइल्याण्डको बैंककस्थित टेर्डथाई क्रिकेट मैदानमा मलेसियाले टस जीतेर पहिले ब्याटिङ रोजेपछि नेपालले बलिङ गरेको हो ।

मलेसियाविरुद्ध नेपाल जीत निकाल्दै सुखद सुरुवात गर्ने लक्ष्यमा रहेको छ । उपाधि जीत्ने लक्ष्य लिएको नेपाल मलेसियालाई हराउँदै उत्कृष्ट सुरुवात गर्न चाहन्छ ।

नेपाल प्रतियोगितामा एकदिवसीय मान्यता पाएको एक्लो राष्ट्र हो । त्यसैले नेपाललाई उपाधि दाबेदार टिम समेत मानिएको छ ।

मलेसिया पनि नेपाललाई हराएर सुखद सुरुवात गर्न चाहन्छ । हालै हङकङविरुद्धको पाँच खेलको टी-ट्वान्टी सिरिजमा मलेसियाले क्लिन स्विप गरेको थियो । त्यसैले नेपाललाई मलेसियाले कडा चुनौती दिने अनुमान गरिएको छ ।

प्रतियोगितामा नेपाल र मलेसियासहित थाइल्याण्ड, सिंगापुर र हङकङले प्रतिस्पर्धा गरिरहेका छन् । राउण्ड रोबिन आधारमा चल्ने प्रतियोगिताको शीर्ष दुई टोलीले एसिया कप छनोटमा प्रतिस्पर्धा गर्न पाउँनेछन् ।