काठमाडौं–अमेरिकाले कबुल गरेको ‘मिलेनियम च्यालेन्ज कर्पोरेसन’ सम्झौताअन्तर्गतको करिब ५६ अर्ब रुपैयाँ सहयोगका लागि नेपालसँग सर्त राखेको छ । अमेरिकी विदेशमन्त्री माइकल रिचार्ड पोम्पियोगले हालै प्रधानमन्त्री केपी शर्मा ओलीलाई पत्राचार गरेर उत्तार कोरियाविरुद्ध राष्ट्रसंघीय सुरक्षा परिषदले लगाएको नाकाबन्दीको समर्थन गर्नुपर्ने र तिब्बती शरणार्थीलाई पक्राउ गरी चीन फर्काउन नहुने सर्त राखेको कान्तिपुर दैनिकमा खबर छ । तर परराष्ट्रमन्त्री प्रदीप ज्ञवालीले भने पत्र पाए पनि अध्ययन गरी नसकेको बताएका छन् । उनले पत्रमा उठाइएका विषय नेपाल लिँदै आएको विदेश नीति अनुकुल नै रहेको पनि बताएका छन् ।

त्यस्तै पीडितलाई नै बिचौलिया बनाएर अढाई करोड ठगी शीर्षकको समाचारमा मानव तस्करहरुले अमेरिका लैजाने भन्दै युवा ठग्ने क्रम बढ्दो छ । पछिल्लो पटक रोल्पा र दाङका ५ युवा यही फन्दामा परेर झण्डै साढे दुई करोड रुपैयाँ डुबाएका छन् । यसअघि जस्तै यो ठगीमा पनि कलाकारको आवरणमा अवैध धन्दा गरिरहेका सुदर्शन गौतम जोडिएका छन् । उनैले हैटी पुर्‍याएर अलपत्र पारेका युवाले डुबेको रकम उठाउने उपायका रुपमा थप युवालाई ठगेको खुलेको छ ।

ढोका थुनेर मोलमोलाइ, धम्क्याएर असुली शीर्षकमा पत्रिकाले छापेको अर्को समाचारमा ललितपुरको किस्ट मेडिकल कलेजले विद्यार्थीलाई धम्क्याएर गैरकानुनी शुल्क लिने गरेको पाइएको छ । विद्यार्थीका अनुसार सञ्चालकहरु कलेज हाता वा वरपर बोलाएर अरिरिक्त शुल्न नबुझाए भर्ना हुन नदिने भनी धम्क्याउने गर्दछन् ।

त्यस्तै फुटबलकी ‘हिरा’ बनेकी उदयमान नेपाली महिला फुटबलर हिराकुमारी भुजेलको संघर्षको कथालाई मुख्य पृष्ठमा छापिएको छ ।

आज पत्रिकामा सम्बन्धको व्यापार शीर्षकमा सम्पादकीय छापिएको छ । सरकारले निर्धारण गरेको शुल्कभन्दा बढी असुलेर विद्यार्थीमाथि व्यापार गर्ने मेडिकल कलेजहरुलाई त्रिभुवन विद्यालय आफैंले कुनै कारबाही नगर्ने प्रवृत्तिले चिकित्सा शिक्षालाई विकृत बनाएको छ । यसको सुधारका लागि अविलम्ब चिकित्सा शिक्षा आयोग दह्रो उभिन सक्नुपर्छ ।