कञ्चनपुर – कञ्चनपुरको महाकाली नगरपालिका र ईलाका प्रहरी कार्यालय दोधारा–चाँदनीमा हुलहुज्जत गर्ने १६ जनालाई प्रहरीले पक्राउ गरेको छ।

आत्महत्या दुरुत्साहन मुद्दामा पक्राउ परेकालाई छोडेको भन्दै आक्रोशित बनेका स्थानीयबासीले प्रहरी कार्यालय र नगरपालिका घेराउ गर्दै ढुंगामुढा गरेपछि नियन्त्रणमा लिइएको प्रहरीले जनाएको छ ।

पक्राउ पर्नेमा १३ जना महिला र ३ जना पुरुष छन् । उनिहरुलाई प्रहरी कार्यालयमा राखिएको जिल्ला प्रहरी कार्यालय कञ्चनपुरका प्रहरी निरीक्षक सुरज कार्कीले जानकारी दिए ।

छोरालाई आत्महत्या गर्न दुरुत्साहन गरेको आरोपमा पक्राउ परेकी महाकाली नगरपालिका–६ की सुशीला थापालाई कारबाहीको नगरी छाडिएको भन्दै स्थानीयबासी हुलहुज्जतमा उत्रिएका थिए ।

महाकाली नगरपालिका–६ का २१ वर्षीय शंकर थापा आफ्नै घर नजिकै घाँस राख्न बनाएको झुपडीमा झुण्डिएको अवस्थामा भेटिएपछि आत्महत्या दुरुत्साहन भन्दै स्थानीयबासी उनकै आमा सुशीला थापालाई कारबाहीको मागसहित विरोधमा उत्रिएका थिए ।