काठमाडौं– प्रमुख प्रतिपक्षी दल नेपाली कांग्रेस केन्द्रीय समितिको बैठक आज (सोमबार)का लागि बोलाइएको छ । बिहान ११ बजेपछि पार्टी केन्द्रीय कार्यालय सानेपामा बस्ने बैठकमा पार्टीको अनुशासन समिति गठन तथा निर्वाचन समिति गठनका विषयमा छलफल हुने एजेन्डा तय भएको पार्टी कार्यालयले जनाएको छ ।

आजको बैठकमा नेपाली कांग्रेसबीचको विवादको विषय सतहमा आउने नेताहरुले आंकलन गरेका छन् । पार्टी सभापति शेरबहादुर देउवाको भूमिकालगायतका विषयमा रुष्ट बनेका केन्द्रीय सदस्यहरुले नेतृत्वमाथि नै कडा आलोचना गर्ने बताएका छन् ।

यसअघि गत फागुन १४ गते बोलाइएको बैठक सभापति शेरबहादुर देउवा र वरिष्ठ नेता रामचन्द्र पौडेल पक्षबीच अनुशासन र निर्वाचन समिति गठनका विषयमा सहमति हुन नसक्दा बैठक बस्दै नबसी स्थगित गरिएको थियो । पार्टी कार्यालयले भने सहमतिका लागि थप छलफल आवश्यक रहेको भन्दै सो बैठक स्थगन गरिएको जनाएको थियो ।

आज पनि केन्द्रीय समिति बैठक बस्नुअघि दुवै पक्षबीच पदाधिकारीस्तरमा समिति गठन सम्बन्धमा सहमतिको प्रयास गरिने बताइएको छ । संयोजकसहित पाँच सदस्य रहने दुवै समितिलाई कांग्रेसमा महत्वको रूपमा लिइन्छ । समिति गठनमा दुवै पक्षले आफू अनुकूल खोज्दा सहमतिमा ढिलाइ भएको बुझिएको छ ।

त्यस्तै बैठकमा पार्टीको विधानअनुसार नियमावली निर्माण, सरकारका कामकारवाही, समसामयिक राजनीतिलगायत विषयमा पनि छलफल हुने पार्टी कार्यालयले जनाएको छ ।