काठमाडौं– एक महिलासँग अमेरिका जान बैंक ब्यालेन्स देखाउनुपर्ने भन्दै विभिन्न प्रलोभनमा पारी ६० लाख ठगी गरको आरोपमा प्रहरीले दुई जनालाई पक्राउ गरेको छ ।

अमेरिका जाँदा ६० लाख बैंक ब्यालेन्स देखाउनु भन्दै एक महिलालाई ठगी गरेको आरोपमा प्रहरीले बाग्लुङका रामचन्द्र कुँवर र ललितपुरका गणेश लामालाई पक्राउ गरेको हो ।

महानगरीय अपराध महाशाखाको टोलीले उनीहरुलाई भक्तपुरबाट आइतबार पक्राउ गरेको जानकारी दिएको हो ।

प्रहरीका अनुसार उनीहरुले नुवाकोट शिवपुरी गाउँपालिका–३ की सानुमाया लामालाई अमेरिका जानका लागि बैंक ब्यालेन्स् देखाउनुपर्ने भन्दै विभिन्न प्रलोभनमा पारेर रामचन्द्र कुँवरको खातामा उक्त रकम राख्न लगाएका थिए ।

लामाले उनको खातामा पैसा राखेको भोलिपल्ट उनीहरुले प्राईम बैकको चावहिल, नयाँबानेश्‍वर, कोटेश्‍वर, सामाखुसी र ईमाडोलबाट नक्कली कागजपत्र र नक्कली सवारी चालक अनुमति पत्र राखेर रकम झिकेर फरार भएको प्रहरी अनुसन्धानबाट खुलेको छ ।

प्रारम्भिक अनुसन्धानका क्रममा उनीहरुले अन्य ३ जनाबाट समेत ७० लाख ठगी गरेको खुल्न आएको प्रहरीले जनाएको छ ।