घोराही– नेपाली कांग्रेसका नेता एवम् पूर्व सांसद गेहेन्द्र गिरीले मादक पदार्थ सेवन गरी चलाएको कारले ठक्कर दिँदा एकजना पैदल यात्रु गम्भीर घाइते भएका छन् ।

दाङको लमही नगरपालिकास्थित उचानिम्बु भन्ने स्थानमा गिरीले चलाउँदै गरेको बा २० च २२३९ नम्बरको कारले आइतबार साँझ पैदल यात्रुलाई ठक्कर दिएको हो ।

इलाका प्रहरी कार्यालय अमिलियाका अनुसार गिरीको कारले ठक्कर दिएर गम्भीर घाइते हुने पैद यात्रुमा कैलालीको धनगढी घर भइ दाङको लमही क्षेत्रमा बस्दै आएका ३५ वर्षीय रकमबहादुर विक छन् ।

घाइते विकको टाउको र घुँडामा चोट लागेको छ । लमही अस्पतालमा प्रारम्भिक उपचार पछि विकलाई थप उपचारका लागि कोहलपुर मेडिकल कलेज रेफर गरिएको प्रहरीले जनाएको छ ।

प्रहरीले ठक्कर दिने कार र कारका चालक पूर्व सांसद गिरीलाई नियन्त्रणमा लिएको छ । स्वास्थ्य परीक्षणका क्रममा पूर्व सांसद गिरीले मदिरा सेवन गरेको भेटिएको प्रहरीको भनाइ छ ।