काठमाडौं- चीनबाट उद्धार गरिएका नेपालीहरुले काठमाडौंमा जहाज अवतरण गर्ने वित्तिकै खुशीयाली मनाए । उनीहरुले विमान अवतरण हुनासाथ ताली बजाएर एक-अर्काबीच खुशी साँटासाँट गरेका हुन् ।

वुहानबाट मातृभूमि आउन पाउँदा निकै खुशी लागेको विमानमा भएका विद्यार्थीहरुले जनाएका छन् । उनीहरुले चीनको उदास नेपाल पुग्दा खुशीयालीमा परिणत भएको बताएका छन्।

सरकारले वुहानबाट १ सय ७५ जना नेपालीलाई उद्धार गरेको हो । नेपाल फर्किनका लागि आवेदन भरेका १ सय ८५ जनामध्ये १७० जना विद्यार्थी, एक जना कामदार, दुई जना पर्यटक तथा दुई जना बालबालिका नेपाल फर्किएको चीनस्थित नेपाली दूतावासले जनाएको छ ।

अन्य १० जना चीनमै रोकिएका छन् । ६ जनालाई ज्वोरो आएको हुँदा नेपाल नल्याइएको र ४ जनाले नेपाल नफर्किने जनाएको दूतावासले जानकारी दिएको हो ।

आइतबार बिहान नेपाल अवतरण गरेका उनीहरु सबैलाई बसमार्फत भक्तपुरको खरीपाटीस्थित क्वारेन्टाइनमा पुर्‍याइएको छ ।