काठमाडौं- प्रधानमन्त्री केपी शर्मा ओलीले चीनको कोरोना प्रभावित क्षेत्रमा रहेका नेपालीलाई भोलि नेपाल ल्याइने बताएका छन् ।

आज संसदमा सम्बोधन गर्दै प्रधानमन्त्रीले चीनमा रहेका नेपालीलाई लिन आज जहाज जाने र भोलि नेपाल ल्याइपुर्याउने बताए ।

कोरोना भाइरसले समस्या सिर्जना गरिरहेको बताउँदै उनले चीनबाट शुरु भएका कारण हामीलाई पनि प्रत्यक्ष असर पर्ने देखिएको बताए ।

कोरोना नियन्त्रणका लागि चीनले गरेको काम प्रशंशायोग्य रहेको भन्दै चीनले नेपालीलाई सुरक्षित राखेको बताए । चीनले सुरक्षित रुपमा राख्दा अहिलेसम्म नेपालीहरुमा संक्रमित नभएको उनले बताए ।

‘चीनबाट हाम्रा नेपाली विद्यार्थी आज नेपाल ल्याउँदैछौं । आज गएपछि नेपाली जहाज भोलि आइपुग्छ,’ प्रधानमन्त्रीले भने, ‘उनीहरुलाई राख्ने उचित प्रवन्ध गर्नेछौं । नेपाली विद्यार्थीहरु र नेपाली समुदायलाई चीनले जसरी राम्रोसँग देखभाल राखेर सुरक्षित राखेको चीनलाई धन्यवाद दिन चाहन्छु ।’