काठमाडौं– सरकारले चीनबाट ल्याइने नेपालीहरुलाई कसरी सुरक्षितरुपमा विमानस्थलबाट खरिपाटीसम्म लैजाने र कसरी राखिने भन्ने विषयमा आज गरेको ‘रिहर्सल’का दृश्य सञ्चारकर्मीलाई खिच्न रोक लगाएपछि उनीहरुले सरकारको तयारीबारे आशंका उब्जिएको जनाएका छन् ।

आज गरिएको  ‘रिहर्सल’का दृश्य खिच्न रोक लगाइनु र प्रवेशमा निषेध गर्दै अभद्र व्यवहार गर्नु उचित नरहेको नेपाल पत्रकार महासंघ भक्तपुरका अध्यक्ष पुष्करराज बुढाथोकीले बताए ।

उनले भने, “सञ्चारकर्मीले लोकतन्त्रको प्रत्याभूति कहिले गर्ने ? जनताले कस्तो ठाउँमा चीनबाट ल्याइएकालाई राखिँदै छ भन्ने जानकारी दिनुको सट्टा उल्टै लुकाउने काम भएको छ, यसले सरकारको तयारीबारे शङ्का जन्माएको छ ।”

भक्तपुरको खरिपाटीमा भएको ‘रिहर्सल’ को तस्बिर र भिडियो लिन गएका सञ्चारकर्मीमाथि सुरक्षाकर्मीले रोक लगाउनुका साथै अभद्र व्यवहार गरेका थिए ।

सञ्चारकर्मीलाई प्राधिकरणको मूलद्वारबाटै रोक लगाउनुका साथै सञ्चारकर्मीलाई सुरक्षाकर्मीले हातपातको प्रयास गरेपछि प्रहरी र सञ्चारकर्मीबीच विवाद चर्किएको थियो ।

सञ्चारकर्मीले विरोध गरेपछि क्वारेन्टाइन स्थल अगाडिसम्म प्रवेश गर्न दिइए पनि क्वारेन्टाइनको तस्बिर भने खिच्न रोक लगाइएको थियो ।