सोल– जापान र दक्षिण कोरियाका विदेशमन्त्रीले यसै साता उच्चस्तरीय भेटवार्ता गर्ने भएका छन् ।

दक्षिण कोरियाली विदेश मन्त्री काङ क्यूङ–ह्वाले आफ्ना जापानी समकक्षी तोसिमिचु मोटेगीसँग शनिबार बिहान भेटवार्ता गर्ने दक्षिण कोरियाको योनहाप समाचार संस्थाले जनाएको छ ।

जर्मनीको म्युनिख शहरमा आयोजना हुन लागेको म्युनिख सुरक्षा सम्मेलनका क्रममा हुने भेटवार्तामा दक्षिण कोरियामाथि जापानले लगाइरहेको भनिएको निर्यात प्रतिबन्ध फुकुवा गर्ने विषयमा छलफल हुने अपेक्षा गरिएको छ ।

जापान र दक्षिण कोरियाबीच पछिल्लो समय दोस्रो विश्वयुद्धको समयका कोरियाली युद्धबन्दीका साथै सैनिक गुप्तचरी सूचना आदानप्रदानका विषयमा विवाद उत्पन्न भएको छ ।

यिनै विषयले दुई मुलुकबीच उच्च प्रविधिका सामानको आयात निर्यातमा समस्या चुलिएको छ ।

द्विपक्षीय भेटवार्ताका क्रममा चीनबाट फैलिएको कोरोना भाइरस र त्यसको असरका बारेमा पनि छलफल हुने अपेक्षा गरिएको छ । चीनबाट फैलिएको कोरोना भाइरसबाट कोरिया र जापानलाई पनि प्रभावित भएका छन् ।

त्यसबाहेक शनिबार नै दुबै मुलुकका विदेश मन्त्रीले अमेरिकी विदेश मन्त्री माइक पोम्पेओसँग पनि त्रिपक्षीय भेटघाट गर्ने कार्यक्रम छ । भेटमा उत्तर कोरियाको आणविक निःशस्त्रीकरण तथा मध्यपूर्व मामिलाका विषयमा छलफल हुने बताइएको छ ।

काङ, पोम्पेओ र मोटेगीबीच गत महिना अमेरिकाको सान फ्रान्सिस्कोमा त्रिपक्षीय भेटवार्ता भएको थियो ।