लहान– मधेसलाई टुक्र्याएर अलग्गै देश बनाउने भनेर पृथकतावादी गतिविधिमा सक्रिय भएका सीके राउतले पहिलोपटक आफू नेतृत्वको गठवन्धनमा राष्ट्रिय गान बजाएका छन् ।

आइतवार सिरहाको लहानमा बोलाइएको ‘स्वतन्त्र मधेस गठवन्धन’को राष्ट्रिय परिषद बैठक राष्ट्रिय गान ‘सयौं थूंगा फूलका हामी, एउटै माला नेपाली…’ गाएर शुरु गरियो । परिषद बैठकको शुरुमै नेपाली भेषमा सजिएका पञ्चकन्याले राष्ट्रिय गान गाएका थिए ।

सरकारसँग भएको ११ बुँदे सम्झौता गर्दै राउत नेतृत्वको गठवन्धनले पृथकतावादी आन्दोलन परित्याग गर्ने घोषणा गरेको थियो । सरकारसँग भएको ११ बुँदे सम्झौताबारे छलफल गरेर आगामी रणनीति तयार गर्न आइतबार र सोमबारका लागि लहानमा परिषद बैठक बोलाइएको हो ।

परिषदमा सहभागी हुन सदस्यहरुलाई नेपाली नागरिकताको प्रमाणपत्र बोकेर ल्याउन उर्दी जारी गरिएको थियो । परिषदको बैठक हलमा छिर्नका लागि नागरिकता परीक्षण गरेर मात्रै जानदिने व्यवस्था गरिएको जनाइएको छ ।

आइतवार शुरु भएको बैठकमा गठवन्धनको केन्द्रीय तदर्थ समितिका सदस्यसहित तराईंका सबै जिल्लाका जिल्ला संगठन सहयोजकहरु सहभागी छन् ।

परिषद वैठकलगत्तै गठवन्धनले विस्तारित बैठक समेत आह्वान गर्ने जनाइएको छ । त्यसपछि संयोजक राउत लगायत गठवन्धनका केन्द्रीय नेताहरुले भेटघाट कार्यक्रम शुरु गर्नेछन् ।