जाजरकोट – वन तथा वातावरणमन्त्री शक्तिबहादुर बस्नेतले सञ्चार क्षेत्रले राज्यलाई रचनात्मक खबरदारी गर्नुपर्ने बताउनुभएको छ ।

सञ्चारमाध्यमले गर्ने निरन्तरको खबरदारीले सकारात्मक प्रभाव पर्ने मन्त्री बस्नेतको विश्वास छ ।

‘सञ्चार क्षेत्र छाडा भएमा त्यो सन्देश आम पाठकमा राम्रो पर्दैन । सञ्चार क्षेत्रले सामाजिक उत्तरदायित्वको भूमिकासमेत निर्वाह गर्नुपर्छ ।’ बस्नेतले भने ‘पत्रकार आचारसंहिता कार्यान्वयनमा गम्भिर बन्न पर्छ ।’

प्रेस काउन्सिल नेपाल र पत्रकार महासङ्घ जाजरकोटशाखाद्वारा संयुक्त रुपमा आयोजित महासङ्घ शाखाको नवनिर्मित भवनको उद्घाटनमा मन्त्री बस्नेतसहित महासङ्घका केन्द्रीय अध्यक्ष गोविन्द आचार्य पनि सह्रिक भएका थिए ।

कार्यक्रममा प्रतिनिधिसभा सदस्य सत्य पहाडी, कर्णाली प्रदेशसभा सदस्य गणेशप्रसाद सिंह, प्रेस काउन्सिल सदस्य ईश्वरी ओझा, गोविन्द चौलागाई र पत्रकार महासङ्घका कर्णाली प्रदेशका महासचिव दीपेन्द्र शर्माको सहभागिता रहेको थियो ।