तेहरान– इरानमा एकजना अमेरिकी नागरिकलाई १० वर्षको जेलसजाय सुनाइएको छ । ४६ वर्षीय अमेरिकी नागरिक माइकल ह्वाइटलाई इरानको अदालतले १० वर्ष काराबास सजाय सुनाएको हो ।

गत जुलाईमा इरानको मशहद शहरमा एकजना इरानी महिलासँग भेट्न गएका बेला प्रहरीले उनलाई गिरफ्तार गरेको थियो । इरानका सर्वोच्च नेताको अपमान गरेको तथा आफ्नो व्यक्तिगत तस्बीर सार्वजनिक गरेको अभियोगमा दोषी ठहर गर्दै अदालतले उनलाई १० वर्षको जेलसजाय सुनाएको हो ।

के कारणले अदालतले सर्वोच्च नेताको अपमान गरेको अभियोगमा दोषी ठहर गरेको हो भन्ने स्पष्ट नभएपनि उनले इरानी महिलासँगै बसेर खिचेको फोटो सामाजिक सञ्जालमार्फत् सार्वजनिक गरेका थिए ।

क्यालिफोर्निया राज्यमा बसोबास गर्ने ह्वाइटले अमेरिकी नौसेनामा १३ वर्ष सेवा गरेको बताइएको छ ।

इरानी अधिकारीले यसबारे केही विवरण सार्वजनिक गरेका छैनन् । यद्यपि ह्वाइटका पारिवारिक वकिलले जनाएअनुसार उनलाई गत मार्च ६ र ९ तारिखकको दिन भएका बेग्लाबेग्लै सुनुवाईपछि सजाय सुनाइएको हो ।

अमेरिकाको विदेश मन्त्रालयले भने माइकलमाथिको फैसला साँच्चै नै अपराध गरेकाले हो वा राजनीतिक उद्देश्यबाट प्ररित भएर सजाय सुनाइएको हो, त्यसबारे जानकारी लिइने जनाएको छ ।