काठमाडौं– चीनको उहानमा रहेका नेपालीलाई फागुन तीन गते नेपाल फर्काउने तयारी थालिएको छ ।

मंगलबार बसेको मन्त्रिपरिषद् बैठकले फागनु ३ गते शनिवार चीनको कोरोना संक्रमित क्षेत्रमा रहेका नेपालीलाई स्वदेश फर्काउने निर्णय भएको थियो ।

चीनको बेजिङमा रहेको नेपाली दूतावासले चीनको हुबेमा रहेका नेपालीहरुलाई स्वेदश फर्काउनका लागि जहाजको उडान अनुमति मागेको जानकारी त्यहाँ रहेका नेपालीलाई दिएको छ ।

दूतावासले सन्देश पठाउँदै उद्धारका लागि तयारी अवस्थामा रहन आग्रह गरेको छ ।

हुबेमा रहेका नेपालीलाई वीच्याटमार्फत तयार रहन सन्देश पठाइएको हो ।

उहानमा रहेका नेपालीहरूलाई पठाएको सन्देशमा उडानको अनुमति पाउने बित्तिकै “हुबेका विभिन्न स्थानमा रहेका नेपालीलाई वुहानमा भेला गर्नका लागि सवारीसाधन लगायतको व्यवस्थापन गरिने र त्यसका लागि समय पनि तोकिने“ उल्लेख छ ।

हुबेमा रहेका नेपालीहरूलाई शनिवार स्वदेश फर्काउने निर्णय गरेसँगै त्यसका लागि विभिन्न तयारी भइरहेको स्वास्थ्य मन्त्रालयका अधिकारीहरुले बताएका छन् ।

नेपाल फर्कन चाहनेहरूलाई सरकारले आवेदन दिन आह्वान गरेकामा १८७ जनाले निवेदन दिएका थिए ।

उनीहरूलाई नेपाल वायुसेवा निगमको जहाजबाट एकैपटकमा नेपाल ल्याउन लागिएको स्वास्थ्य मन्त्रालय श्रोतले जानकारी दियो ।

उद्धार गरेर ल्याइएका नेपालीहरूलाई दुई सातासम्म भक्तपुरको खरिपाटीस्थित नेपाल विद्युत् प्राधिकरणको तालिम केन्द्रसहितका चार स्थानमा चिकित्सकीय निगरानीमा राखिने तयारी गरिएको छ ।

हुबेमा रहेका नेपालीहरूलाई लिन जाने जहाजमा स्वास्थ्यकर्मीको व्यवस्था गरिने छ । कोरोना भाइरसबाट बच्ने उपायहरूको तालिम लिएका स्वास्थ्यकर्मी विमानमा हुनेछन् ।

नेपालीको उद्धारका लागि नेपाल वायुसेवा निगमको जहाज पठाइनेछ ।

नेपालबाट जाने विमानमा चार जना स्वास्थ्यकर्मीहरू पठाइन लागेको स्वास्थ्य मन्त्रालय श्रोतले बताएको छ ।

मङ्गलवार सेना, सशस्त्र र जनपथ प्रहरी एवम् स्वास्थ्यकर्मी सम्मिलित ८६ जनलाई सुरक्षित भएर काम गर्ने तालिम दिइएको थियो ।