काठमाडौं– घरमै गम्भीर घाइते अवस्थामा फेला परेकी पूर्व सचिव अर्जुन कार्कीकी श्रीमती मुना कार्कीको उपचारका क्रममा मृत्यु भएको छ ।

नेपाल सरकारका सेवा निवृत्त सचिव कार्कीकी श्रीमती मुना सोमबार बिहान सानेपास्थित आफ्नै निवासमा गम्भीर घाइते अवस्थामा फेला परेकी थिइन् ।

आक्रमणबाट रकताम्य अवस्थामा फेला परेकी कार्कीलाई उपचारका लागि ललितपुरको स्टार अस्पतालमा लगिए पनि उपचारकै क्रममा मृत्यु भएको जनाइएको छ ।

सोमबार बिहान पूजाका लागि पशुपतिनाथको मन्दिर गएका पूर्व सचिव अर्जुन कार्कीले घर पुग्दा श्रीमती मुनालाई रकताम्य अवस्थामा फेला परेका थिए । घरमा काम गर्ने दाङ स्थायी घर भएका विजय चौधरी पनि मृत अवस्थामा फेला परेका थिए ।

श्रीमतीलाई रकताम्य अवस्थामा देखेपछि बेहोस भएका अर्जुनको अवस्था देखेर स्थानीयले प्रहरीलाई खबर गरेका थिए ।

महानगरीय प्रहरी परिसर ललितपुरबाट खटिएको प्रहरी टोलीले कामदार चौधरीको झुन्डिएको अवस्थामा शव फेला पारेको थियो ।

ललितपुर प्रहरीले मुनाको पनि मृत्यु भइसकेको भन्दै महानगरीय अपराध महाशाखाको टोलीलाई बोलाएको थियो । तर, चिकित्सकसहित पुगेको महाशाखाको टोलीले मुना गम्भीर घाइते भएको, तर मृत्यु नै नभएको भनेपछि उपचारका लागि अस्पताल लगिएको थियो ।

तर, अस्पताल लगिएको केही समयमै चिकित्सकहरुले मुनाको मृत्यु भइसकेको जनाएका छन् ।

महानगरीय प्रहरी परिसर ललितपुरका प्रमुख टेकप्रसाद राईले घटनाको अनुसन्धान जारी रहेको जानकारी दिए ।