बैंकक– थाइल्याण्डमा कोरोनाभाइरसका ७ नयाँ संक्रमित देखा परेका छन् । थाइल्याण्डको रोग नियन्त्रण विभागले जनाएअनुसार नयाँ संक्रमित ७ जनामध्ये ४ जना चिनियाँ पर्यटक र बाँकी ३ जना थाई नागरिक छन् ।

नयाँ पत्ता लागेका सबै ७ संक्रमित अस्पतालमा उपचाररत रहेको थाई अधिकारीले जनाएका छन् । ४ चिनियाँमध्ये तीन जना चिनियाँ संक्रमितको परिवारका सदस्यमा यसअघि भाइरसको संक्रमण फेला परेको र अर्का चिनियाँ संक्रमित चीनको ‘जोखिमपूर्ण क्षेत्र’ बाट आएको थाइल्याण्डको रोग नियन्त्रण विभागले जनाएको छ ।

त्यस्तै, नयाँ संक्रमित तीन थाई नागरिक मध्ये दुई जना चिनियाँ संक्रमितको संसर्गमा आएको र अर्का थाई संक्रमित भने चीनबाट उद्धार गरी ल्याइएको बताइएको छ ।

यससँगै थाइल्याण्डमा कोरोनाभाइरसबाट संक्रमितको सङ्ख्या ३२ पुगेको छ । संक्रमित ३२ मध्ये २३ जना चिनियाँ पर्यटक र बाँकी ९ जना थाई नागरिक छन् ।