मुम्बई – रजनीकान्तको स्टारडम देख्दा जुन फिल्मले पनि कमाइ गर्छन् भन्ने हुन्छ । उनले खेलेका फिल्मले लगानीभन्दा बढी कमाउने गर्छन् ।

हालै रिलिज भएको फिल्म ‘दरबार’ ले भने लगानी उठाउन सकेन । लगानी नउठान नसकेपछि फिल्म विवादमा परेको छ ।

यो फिल्मका वितरकहरुले मेकर ए आर मुरुगादाससँग रिफन्डको माग गरेका छन् । रजनीकान्तको यो फिल्मबाट धेरै नै घाटा परेको वितरकहरुको भनाइ छ । वितरकहरुले सुपरस्टार रजनीकान्त, लायका प्रोडक्सन र ए आर मुरुगादासविरुद्ध उजुरी हालेर मुआब्जा दाबी गरेका छन् ।

केही दिन पहिले केही वितरकहरु रजनीकान्तको घरमा पुगेका थिए । तर त्यहाँ सेक्युरिटीले फिर्ता पठाइदिए । एक वितरकले आफूहरु भोक हडतालमा जाने बताएका थिए ।

फिल्ममेकर मुरुगादासलाई धम्की पनि आउन थालेको छ । उनले धम्की आएको भन्दै प्रहरीको सुरक्षाको माग गरेका छन् । उनले आफ्नो घरबाहिर प्रहरी राख्न समेत अनुरोध गरेका छन् ।

रजनीकान्तको ‘दरबार’ १३० करोड भारुमा बनेको थियो । यसमध्ये आधा बजेट रजनीकान्तको पारिश्रमिक थियो । यो फिल्ममा रजनीकान्त २७ वर्षपछि प्रहरीको भूमिकामा देखिएका थिए ।

जनवरीमा रिलिज भएको यो फिल्मले सोचेजस्तो कमाइ गर्न सकेको थिएन ।