काठमाडौं– सञ्चार तथा सूचना प्रविधिमन्त्री गोकुल बाँस्कोटाले बालुवाटारको सरकारी जग्गा हिनामिना प्रकरण लाल र श्वेत फित्ताको कुरा नभई कानूनी कुरा भएको बताएका छन् ।

बिहीवार मन्त्रिपरिषद्का निर्णय सार्वजनिक गर्न मन्त्रालयमा आयोजित पत्रकार सम्मेलनमा सरकारका प्रवक्ता समेत रहेका मन्त्री बाँस्कोटाले सरकारले कसैलाई भेदभाव नगरेको बताए ।

उनले भने, ‘यहाँ लाल फित्ताधारी र श्वेत फित्ताधारीको व्यवहार भएको छैन। यो कानुन प्रयोजनको कुरा हो।’

उनले बालुवाटार जग्गा प्रकरणमा अब सरकारको काम सकिएको मन्त्री बाँस्कोटाले बताए ।

“बालुवाटार प्रकरणमा एक प्रकारले भन्ने हो भने सरकारको काम सकिएको छ । अब अदालतमा गएको छ, अदालतले जे फैसला गर्छ सरकारले त्यही कार्यान्वयन गर्ने हो,” उनले भने, “पूर्वाग्रहको कुरा छैन । आरोपित हुँदैमा बेहोर्नुपर्दैन, भोलि प्रमाणित नभएमा सरकराले फेरि समातेर जेल हाल्दैन । दोषी देखिए सरकारको के लाग्छ त बाबा !”