काठमाडौं– रसुवागढी नाकाबाट प्रहरीले साढे २ किलो सुनसहित ६ जनालाई पक्राउ गरेको छ ।

ना १ झ ३५४२ नम्बरको टाटा सुमो गाडीमा सवार चालकसहितका ६ जनालाई सुनसहित पक्राउ गरिएको जिल्ला प्रहरी कार्यालय रसुवाका प्रमुख प्रहरी नायव उपरीक्षक (डिएसपी) भाग्येन्द्रपुरुष ढकालले जानकारी दिए ।

‘उनीहरु चीनबाटै नेपाली नम्बरप्लेटको गाडीमा आएका भन्ने कुरा खुलेको छ । अहिलेसम्म साढे २ किलो सुन फेला परेको सूचना पाएका छौं,’ डिएसपी ढकालले खबरहबसँग भने ।

सुनसहित पक्राउ पर्नेमा सिन्धुपाल्चोकको भोटेकोशी गाउँपालिका–५ का ३४ वर्षीय नवाङ नुर्फु तामाङ, सोही ठाउँका २४ वर्षी ग्याल्जेन शेर्पा, २३ वर्षीय शुक्ला लामा, ३२ वर्षीय सुवास तामाङ, १९ वर्षी साङ शेर्पा र सवारी चालक दोलखाको तामाकोशी गाउँपालिका–५ घर भएका २३ वर्षीय कुलनारायण श्रेष्ठ छन् ।

डिएसपी ढकालका अनुसार उनीहरुले ५ ओटा टुक्रामा विभाजन गरेर साढे २ किलो सुन ल्याएका थिए । २ वटा टुक्रा व्यक्तिका शरीरमा बाँधेको तथा ३ वटा टुक्रा गाडी चालकको सिज नजिकैको म्याटमा लुकाएर ल्याएको अवस्थामा बरामद भएको ढकालले जानकारी दिए ।