काठमाडौं – नेयमारले आफ्नो गोल बास्केटबल लिजेण्ड कोबी ब्रायन्टलाई समर्पण गरेका छन् ।

लिग वानमा आइतबार भएको लिल्लेविरुद्ध पेरिस सेन्ट जर्मन (पीएलसजी) का लागि दुई गोल गरेका नेयमारले ब्रायन्टलाई आफ्नो गोल समर्पण गरेका हुन् ।

५ पटकका नेसनल बास्केटबल च्याम्पियन ब्रायन्ट र उनकी छोरीको आइतबार हेलिकोप्टर दुर्घटनामा मृत्यु भएको थियो ।

लिल्लेलाई पीएसजीले २–० गोल अन्तरले पराजित गरेको थियो । उक्त दुवै गोल नेयमारले गरेका थिए ।

नेयमारले टोलीका लागि २८ औं मिनेटमा पहिलो गोल गर्दै अग्रता दिलाएका थिए भने ५२ औं मिनेटमा पाएको पेनाल्टीमा गोल गर्दै टिमलाई २–० को अग्रता दिलाएका थिए । उनको उक्त पेनाल्टी गोल टीमको जीतका लागि निर्णायक बन्यो ।

नेयमारले पेनाल्टीमा गोल गरिसकेपछि आकाश तिर हेर्दै एक हातका दुई र अर्को हातका चार औंला उठाउँदै ब्रायन्टको जर्सि नम्बर २४ का लागि प्राथना गरेका थिए ।

बास्केटबलका प्रशंसक नेयमारले खेल सकिएपछि इन्टाग्राममा ब्रायन्टलाई लिजेण्ड भन्दै दु: ख व्यक्त गरेका छन् ।