काठमाडौं- लेस्टर सिटी एफए कप फुटबलको पाँचौँ चरणमा प्रवेश गरेको छ । चौथो चरण अन्तर्गत शनिबार राति भएको खेलमा लेस्टर सिटीले ब्रेन्टफोर्डलाई १–० ले पराजित गरेको हो ।

अवे मैदानमा भएको खेलमा प्रिमियर लिग क्लब लेस्टर सिटीले च्याम्पियनसिप क्लब ब्रेन्टफोर्डलाई पराजित गरेर अघिल्लो चरणमा स्थान पक्का गरेको हो । लेस्टरको जितमा चौथो मिनेटमा केलिची इहिनाचोले गरेको गोल नै निर्णायक बन्यो ।

शनिबार राति नै भएको खेलमा हल सिटीलाई पराजित गरेर चेल्सीले पनि पाँचौँ चरणमा स्थान बनाएको छ । अवे मैदानमा भएको खेलमा चेल्सीले हल सिटीलाई २–१ ले पराजित गरेको हो ।

बर्नलीलाई २–१ ले पराजित गरेको नर्विच, मिलवाललाई २–० ले पराजित गरेको शेफिल्ड युनाइटेड बार्नेस्लीलाई ४–२ ले पराजित गरेको पोर्टस्माउथ तथा वेष्ट ह्यामलाई १–० ले पराजित गरेको वेष्ट ब्रोम पनि पाँचौँ चरणमा प्रवेश गरेका छन् ।

तर १–१ को बराबरी गरेलेका टोटनह्याम र साउथह्याम्पटन तथा कार्डिफ र रिडिङ एवम् गोलरहित बराबरी खेलेका न्यूक्यासल र अक्सफोर्ड युनाइटेड तथा कोवेन्ट्री र बर्मिङ्घमले पाँचौँ चरण प्रवेशका लागि रिप्ले खेल्नु पर्ने भएको छ।