काठमाडौं- श्रीलंकाका राष्ट्रपति गोटाबया राजापाक्षले पहिलोपकट देशमा चलेको गृहयुद्धको क्रममा बेपत्ता भएकाहरुका बारेमा औपचारिक रुपमा बोलेका छन् ।

गृहयुद्धमा बेपत्ता भएका २० हजार भन्दा बढी मानिसहरुको मृत्यु भएको राष्ट्रपति गोटाबया राजापाक्षले पहिलो पटक स्वीकार गरेका हुन् ।

राजधानी कोलम्बोमा संयुक्त राष्ट्रसंघका दूतहरुसँगको बैठकको क्रममा राष्ट्रपति राजापाक्षले बेपत्ताहरुको मृत्यु भएको बताएका हुन् ।

राष्ट्रपति कार्यालयबाट जारी गरिएको वक्तव्यमा हाल बेपत्ताको सूचिमा रहेकाहरुलाई मृत घोषित गरी उनीहरुको मृत्यु प्रमाणपत्र जारी गर्ने प्रक्रिया शुरु हुने जनाइएको छ ।

बेपत्ता मानिसका सयौँ परिवारहरुले आफ्ना प्रियजनको अवस्था र उनीहरु कहाँ छन् भन्ने थाहा पाउनु पर्ने माग गर्दै श्रीलंकामा र्‍याली गर्ने गरेका छन् ।

अधिकांशले आफ्ना प्रियजन अझै पनि जीवित नै छन् भन्ने आश गुमाएका छन्, तर उनीहरुको अवस्था औपचारिक रुपमा थाहा पाउनु पर्ने उनीहरुको माग छ ।

बेपत्ता अधिकांश सुरक्षाबलको नियन्त्रणमा रहेको र मृत्यु भएको भए पनि सुरक्षाबलकै कारण भएको बेपत्ता व्यक्तिका परिवारको आरोप छ । तर श्रीलंका सरकारले भने सो कुरा अस्वीकार गर्दै आएको छ ।

श्रीलंकामा २६ वर्षसम्म चलेको हिंसात्मक गृहयुद्ध सन् २००९ को मे मा सकिएको थियो । श्रीलंकन आर्मीले तत्कालीन बिद्रोही तमिल टाइगरलाई पराजित गरेको थियो । गृहयुद्धले श्रीलंकालाई जातिय विभाजनको अवस्थामा लगेको थियो ।

बुद्धिष्ट सिंघालीको बाहुल्यता र वर्चश्व रहेको सरकार तमिलको विपक्षमा थियो । तमिलहरु आफ्नो छुट्टै राज्य चाहन्थे । २६ वर्षसम्म चलेको युद्धको क्रममा एक लाख मानिसको मृत्यु भएको अनुमान छ । अझै २० हजार बेपत्ता छन् र अधिकांश तमिल हुन् ।

तमिल टाइगरलाई सेनाले पराजित गरेका बेला सन् २००९ मा रक्षा मन्त्री थिए अहिले राष्ट्रपति रहेका राजापाक्ष । उनले औपचारिक रुपमा बेपत्ता सबैको मृत्यु भएको बताउनुको अर्थ युद्धको क्रममा उनीहरु सुरक्षा फौजबाट मारिएका थिए भन्ने हो ।