काठमाडौं – द भ्वाइस अफ नेपाल २ का प्रतिस्पर्धी सनिस श्रेष्ठले पहिलो कोशेलीस्वरूप फिल्म ‘म यस्तो गीत गाउँछु २’ को गीत गाए । यो गीत गाउन पाउँदा  आफूलाई धेरै खुशी लागेको सनिसले बताएका छन् ।

उनले यो गीतको अफर आउँदा आफू आकाशमा उडेको महसुस गरेको प्रतिक्रिया दिए ।

मंगलवार एक कार्यक्रमका सिलसिलामा राजधानीमा भेटिएका सनिसले पत्रकारले सोधेको प्रश्नको जवाफ दिँदै फिल्ममा गीत गाउन पाउँदा ठूलो मौका भएको प्रतिक्रिया दिए ।

‘मलाई संगीतकार अर्जुन पोखरेलले फोन गरेर गीतको अफर गर्नुभयो,’ सनिसले भने, ‘यो गीत गाउँदा मलाई भाग्यमानी फिल ठानेको छु ।’

सनिसले फिल्ममा समावेश ‘दुःखको काँडा’ बोलको गीतमा स्वर दिएका थिए । यो गीत युट्युबमा रिलिज भएको राम्रो प्रतिक्रिया पाएको छ ।

सुगम संगीतमा आधारित यो गीतमा अर्जुन पोखरेलको संगीत र देवल भण्डारीको शब्द सुन्न सकिन्छ ।

सुदर्शन थापाले निर्देशन गरेको फिल्म ‘म यस्तो गीत गाउँछु २’ मा पल शाह र पूजा शर्माको शीर्ष भूमिका रहनेछ ।

फ्यानले सनिसको यो गीत मन परेको प्रतिक्रिया दिएका छन् ।