एसिड आक्रमणमा परेकी लक्ष्मी अग्रवालको जीवनीमा आधारित फिल्म ‘छपाक’ ले बक्स अफिसमा कमाइ गर्न सकेको छैन । दीपिका पादुकोण स्टारर यो फिल्मले चार दिनमा जम्मा २१ करोड ३७ लाख भारु कमाइ गरेको छ ।

भारतीय मिडियाका अनुसार ‘छपाक’ ले शुक्रवार ४ करोड ७७ लाख रुपैयाँ बराबरको कमाइ गर्दै ओपनिङ गरेको थियो । फिल्मले सोमबार भने जम्मा २ करोड ३५ लाख भारु कमाइ गरेको छ ।

यता ‘छपाक’ सँगै रिलिज भएको अजय देवगनको फिल्म ‘तान्हाजी’ ले भने चौथो दिनमा ७५ करोड कमाइ गरिसकेको छ । दुवै फिल्मको कमाइ हेर्दा दर्शकले अजयको तान्हाजीलाई मन पराएका छन् ।

फिल्म ‘छपाक’ रिलिजअघि पनि विवादमा तानिएको थियो । बिहेपछि दीपिका यही फिल्मबाट बलिउडमा कमब्याक गरेकी थिइन् । तर, फिल्मलाई दर्शकले पत्याएनन् ।

यता हलमा रिलिज भएको अजयको तान्हाजीले दर्शकको मन जित्न सफल भएको छ । फिल्ममा अजयका अलावा सैफ अली खान, काजोल लगायतका कलाकारको शीर्ष भूमिका रहेको छ ।