धनगढी– सुदूरपश्चिम प्रदेश सरकारको सामाजिक विकास मन्त्रालयले एम्बुलेन्स खरिद प्रकरणमा भएको भनिएको ‘अनियमितता’बारे सत्यतथ्य बाहिर ल्याउन मुख्यमन्त्री त्रिलोचन भट्टले निर्देशन दिएका छन् ।
मुख्यमन्त्री भट्टले बिहीबार सामाजिक विकास मन्त्री कृष्णराज सुवेदीलाई आफ्नो निवासमा बोलाएर एम्बुलेन्स खरिद प्रक्रियाबारे सम्पूर्ण विवरण सार्वजनिक गर्न निर्देशन दिएका हुन् ।
मन्त्रालयले ६ करोड २७ लाख ३८ हजार ५ सय रुपैयाँमा १६ वटा एम्बुलेन्स खरिद गरी विभिन्न जिल्लाका स्वास्थ्य संस्थालाई वितरण गरेको थियो ।
गत कात्तिक २० गते वितरण गरिएका त्यस्ता एम्बुलेन्सहरु सञ्चालनमा ल्याएको २ महिना पनि नबित्दै काम नै नलाग्ने अवस्थामा पुगेका छन् ।
एम्बुलेन्स वितरण गरिएका स्वास्थ्य संस्थाका एम्बुलेन्स चालकहरुले सुदूरपश्चिम प्रदेश सरकारबाट वितरण गरिएका एम्बुलेन्समा ब्रेक नै नलाग्ने तथा पहाडी क्षेत्रमा चलाउनै गाह्रो हुने गरेको बताएका छन् ।
नेपालमा चलाउन नै नपाइने ट्रकहरुको बडी परिवर्तन गरेर एम्बुलेन्स बनाएर वितरण गरिएको भन्दै सुदूरपश्चिम प्रदेशका विभिन्न राजनीतिक दलले एम्बुलेन्स खरिद प्रकरणमा अनियमितता भएको आरोप लगाइरहेका छन् ।
सोही विषयमा मुख्यमन्त्री भट्टले मन्त्री सुवेदीसँग सोधपुछ गर्नुका साथै एम्बुलेन्स खरिद प्रकरणको सम्पूर्ण विवरण सार्वजनिक गर्न निर्देशन दिएका हुन् ।
मुख्यमन्त्री भट्टको निर्देशन पछि सामाजिक विकास मन्त्रालयले बिहीबार दिउँसो पत्रकार सम्मेलन गरी एम्बुलेन्स खरिद प्रक्रियाबारे जानकारी दिने जनाएको छ । यद्यपि पत्रकार सम्मेलन हुने समय भने तय भइसकेको छैन ।
प्रतिक्रिया