काठमाडौं- पूर्व श्रममन्त्रीहरुले सरोकारवालासँग समन्वय गरेर काम कारबाही गर्न श्रम, रोजगार तथा सामाजिक सुरक्षामन्त्री रामेश्वर राय यादवलाई सझुाव दिएका छन् ।

श्रम मन्त्रालयमा आयोजित छलफलमा उनीहरुले वैदेशिक रोजगारीलाई व्यवस्थित बनाउँदै आन्तरिक रोजगारी सिर्जनामा ध्यान दिन सुझाव दिए । सो अवसरसमा पूर्व श्रममन्त्री मुकुन्द न्यौपानेले मन्त्रालयले काम गर्ने तौरतरिका र सोच्ने तरिकामा रुपान्तरण आवश्यक रहेको बताउँदै कुनै पनि काम गर्नुभन्दा पहिला विज्ञ र सरोकारवालासँग राय लिएर अगाडि बढ्न सुझाव दिए ।

योजना र तयारी बिना मन्त्रीले सस्तो लोकप्रियताको निम्ति बोल्ने तर त्यसअनुरुप परिणाम दिन नसक्दा जनतामा वितृष्णा फैलिएकामा ध्यानकर्षण गराउँदै सरकारले बनाएको कार्ययोजना प्रभावकारी ढङ्गले लागू गर्नुपर्नेमा जोड दिए ।

पूर्वमन्त्री सरिता गिरीले छिमेकी मुलुकको मानव संशाधनको प्रयोग र भौतिक विकासको सुक्ष्म अध्यधन गरी त्यसअनुसार अगाडि बढ्न आग्रह गरेका थिए ।

अर्का पूर्वमन्त्री कमल चौलागाईंले अस्तव्यवस्त बनेको वैदेशिक रोजगारी क्षेत्रको गम्भीररुपमा अध्ययन सुधारका एजेण्डालाई अगाडि बढाउन सुझाव दिए ।  वैदेशिक रोजगारीका साथै आन्तरिक रोजगारी सिर्जना, कृषि, जल र पर्यटनका माध्यमबाट थप अवसर सिर्जना गर्नेतर्फ ध्यान दिन आग्रह गरे ।

सो अवसरमा मन्त्री यादवले पूर्व श्रममन्त्रीको अनुभव र सुझावका आधारमा आगामी रणनीति तय गरिने बताए ।

‘समृद्ध नेपाल, सुखी नेपाली’ नारालाई सफल पार्न सबैको सहयोग अपरिहार्य रहेको बताउँदै मन्त्री उनले वैदेशिक रोजगारका क्षेत्रमा देखापरेका विकृति र विसंगति अन्त्यका लागि आफू प्रयासरत रहेको जानकारी दिए ।

करिब डेढ महिनाअघि मन्त्रालयको जिम्मेवारी सम्हालेका यादवले आज पूर्व श्रममन्त्रीसँग छलफल गरेका हुन्।

उनले मंगलबारमात्रै आगामी तीन महिनाको कार्ययोजना सार्वजनिक गरेका थिए ।  मन्त्रालयले २०४६ पछि श्रम मन्त्रालयको जिम्मेवारीमा रहेका १७ पूर्वमन्त्रीलाई छलफलमा बोलाएको थियो ।