काठमाडौं– महानगरीय प्रहरी (मेट्रो पुलिस)ले सादा पोषाकमा परिचालन हुने घुमुवा प्रहरी खारेज गरिदिएको छ ।

महानगरीय प्रहरी आयुक्त प्रहरी नायव महानिरीक्षक (डिआईजी) विश्वराज पोखरेलले सूचना संकलनका लागि भनेर यसअघि परिचालन हुने गरेका २५ जना घुमुवा प्रहरीलाई फिर्ता बोलाएका हुन् ।

डिआईजी पोखरेलले अब महानगरीय प्रहरी आयुक्तको कार्यालय मातहत कुनै घुमुवा प्रहरी नरहने बताए ।

सूचना संकलनका लागि भनेर परिचालन हुने भएपनि घुमुवा प्रहरीहरु विभिन्न प्रकरणमा मुछिएर विवादमा आउँदै गरेका थिए ।

घुमुवा प्रहरीहरु विभिन्न प्रकरणमा पैसा उठाउनेदेखि अपराधिक गतिविधिमा संलग्न हुने गरेका थिए ।

‘निर्धारण गरिएको जिम्मेवारीभन्दा अन्यत्र लाग्ने गरेका कारण घुमुवा प्रहरीहरुका कारण संठनकै बदनाम हुने गरेको देखियो,’ डिआईजी पोखरेलले भने, ‘अब सूचना संकलनको काम युनिटबाटै गर्छौं ।’

यसअघि घुमुवाका रुपमा परिचालन भएका प्रहरीलाई कार्यालयमा फिर्ता बोलाएर नियमित काममा पठाइने डिआईजी पोखरेलले बताए ।