काठमाडौं- नेपाल उद्योग परिसंघ र नेपाल बैंकर्स संघबीच निजी लगानी प्रवर्द्धन गरी आर्थिक विकासमा सहकार्य गर्ने  विषयमा सम्झौता भएको छ।

परिसंघका अध्यक्ष शतीशकुमार मोर र बैंकर्स संघका अध्यक्ष ज्ञानेन्द्र ढुंगानाले समझदारीपत्रमा हस्ताक्षर गरेका हुन्।

परिसंघका अध्यक्ष मोरले समग्र लगानीको वातावरण बनाउन उद्योगी तथा बैंकहरू एकअर्काका परिपूरक भएकाले यो समझदारी महत्वपूर्ण रहको बताए। यस्तै बैंकर्स संघका अध्यक्ष ढुंगानाले बैंकिङ क्षेत्रमा आएका नयाँ नयाँ व्यवस्थालाई लगानीमैत्री बनाउन आपसी सहकार्य अर्थपूर्ण हुने बताए ।

समझादारीअनुसार, उद्योग परिसंघ र बैंकर्स संघले दुवै पक्षको क्षमता अभिवृद्धिका लागि संयुक्त रूपमा अध्ययन, अनुसन्धान तथा तालिम कार्यक्रमहरू आयोजना गर्ने छन्।

यसैगरी वित्तीय तथा मौद्रिक नीति निर्माणका साथै सम्बन्धित ऐन नियमावलीको परिमार्जनमा साझा हितका विषयमा सरोकारवाहरूसँग सयुक्त रूपमा संवाद तथा छलफलका लागि समेत सहकार्य गर्ने समझदारीमा उल्लेख छ ।