चितवन- शैक्षिक शुल्क बढाएको विरोधमा भरतपुरको सप्तगण्डकी बहुमुखी क्याम्पस र नारायणगढको बालकुमारी क्याम्पसमा विद्यार्थीहरुले तोडफोड गरेका छन् ।

सत्तारुढ नेकपा समर्थित अनेरास्ववियुका विद्यार्थीले कुनै परामर्शविना नै एकतर्फी शुल्क बढाएको भन्दै कलेजमा तोडफोड गर्नुका साथै क्याम्पस प्रशासनमा तालावन्दी गरेका हुन् । तोडफोडबाट क्याम्पसका झ्यालका सीसा फुटेका छन् ।

पब्लिक क्याम्पस संघ चितवनले कक्षा ११ र १२ मा २५ प्रतिशत, स्नातक कार्यक्रममा ३० प्रतिशत, सेमेस्टर प्रणालीमा १२ प्रतिशत तथा स्नातकोत्तर तहमा २५ प्रतिशत शुल्क वृद्धि गरेको छ ।

क्याम्पसले शुल्क वृद्धि गरेपछि विद्यार्थी आक्रोशित हुँदै विरोधमा उत्रिएको अनेरास्ववियू सप्तगण्डकी क्याम्पस इकाई अध्यक्ष हरि आचार्यले बताए । विरोधमा उत्रिएका विद्यार्थीहरुले ४८ घण्टाभित्र बढाइएको शुल्क फिर्ता लिन अल्टिमेटम दिएका छन् ।