काठमाडौं- नेपाल खानेपानी संस्थान र निर्माण कम्पनी हाजमा एन्डो कर्पोरेसनबीच पोखराको मर्दी खोलाको पानी शुद्धीकरण गर्ने सम्झाैता भएको छ। संस्थान र हाजमा कम्पनी बीच  आइतबार द्विपक्षीय सम्झौता भएको हो ।

संस्थानको तर्फबाट महाप्रबन्धक डा. भुपेन्द्र प्रसाद र कम्पनीको तर्फबाट प्रोजेक्ट म्यानेजर हिदेकी ओइसीले सम्झौता पत्रमा हस्ताक्षर गरेका हुन् ।

सम्झौता अनुरुप अब मर्दी खोलाको पानीलाई  प्रशोधन गरेर शुद्धीकरण गरी पिउनका लागि योग्य बनाइने छ ।

जापान सरकारले नेपाल सरकारलाई अनुदान स्वरुप ४ अर्ब ८१ करोड रुपैयाँ सहयोग गर्ने सम्झौता गरेको थियो । सोही सम्झौता अनुरुप अनुदान रकमबाट मर्दी खोलाको पानी शुद्धीकरण गरिने छ ।

जापानले दिएको कुल अनुदान रकम मध्ये ४ अर्ब २१ करोडमा सिभिल कार्यका लागि जापानमै बोलपत्र आह्वान भएको थियो ।  जसमध्ये हाजमा कम्पनीले अनुमानित लागत रकम भन्दा ८ दशमलव २ प्रतिशत कममा बोलपत्र कबोल गरेको थियो ।