दाङ- चालू आर्थिक वर्षको पहिलो पाँच महिनामा दाङमा २० हजार तीन सय सवारी चालक कारवाहीमा परेका छन् ।

जिल्ला ट्राफिक प्रहरी कार्यालय दाङका प्रमुख प्रेमप्रसाद रेग्मीका अनुसार, ट्राफिक नियम विपरित सवारी चलाउँदा कारवाहीमा परेका ती सवारी चालकबाट एक करोड ५५ लाख ७५ हजार रुपैयाँ राजश्व सङ्कलन भएको छ ।

आर्थिक वर्ष २०७५/०७६ मा ३४ हजार ५१० सवारी चालकको कारवाहीबाट एक करोड १३ लाख पाँच हजार रुपैयाँ राजश्व सङ्कलन भएको थियो ।

चालू आवको साउनमा दुई हजार ४ सय सवारी चालकको कारवाहीबाट १५ लाख सात हजार ५ सय राजश्व सङ्कलन भएको छ । त्यस्तै भदौमा चार हजार ३ सय चालकको कारवाहीबाट २६ लाख ९३ हजार ५ सय रुपैयाँ, असोजमा चार हजार ६ सय ५० सवारी चालकको कारवाहीबाट २८ लाख ४२ हजार ५ सय रुपैयाँ राजश्व संकलन भएको छ ।

कात्तिकमा चार हजार ४ सय चालकको कारवाहीबाट २७ लाख २२ हजार र मंसिरमा चार हजार ५ सय ५० सवारी चालकको कारवाहीबाट २८ लाख १५ हजार रुपैयाँ राजश्व सङ्कलन भएको जिल्ला ट्राफिक प्रहरी कार्यालय दाङले जनाएको छ ।

सो अवधिमा दुई हजार ७३५ बस चालक, तीन हजार ६७७ ट्रक चालक, दुई हजार ६१५ जीप चालक, सात हजार ६६० मोटरसाइकल चालक, एक हजार ९२७ ट्र्याक्टर चालक, एक हजार ६८६ टेम्पो चालक गरी जम्मा २० हजार ३०० सवारीसाधन चालक कारवाहीमा परेको ट्राफिक प्रमुख रेग्मीले जानकारी दिए ।

उनले मापसे गरेर सवारी चलाएका, सिटबेल्ट नलगाएका, उछिन्ने, छतमा यात्रु राखेका, प्रयोजन विपरीत चलाएका, लेन अनुशासन मिचेकाजस्ता कारणले गर्दा उनीहरुलाई कानूनी दायरामा ल्याइएको बताए ।