काठमाडौं- मुलुकका विभिन्न भू–भागमा विगत केही समययता भएका पटक–पटकका सडक दुर्घटनालाई मध्यनजर गर्दै नेपाल कम्युनिस्ट पार्टीले सवारी दुर्घटनाको दीगो समाधान खोज्न सरकारलाई आग्रह गरेको छ ।

दुर्घटनामा ठूलो जनधनको क्षति भएकाप्रति दुख व्यक्त गर्दै वर्षेनी हुने ठूलो जनधनको क्षति न्यून गर्न नेकपा बैठकले सरकारलाई आग्रह गरेको हो ।

सडक दुर्घटनाको समस्याको दिगो समाधानका लागि आवश्यक कार्य अगाडि बढाउन, सडक पूर्वाधारमा प्रभावकारी सुधार गर्न, सवारी चालक र सवारी धनीलगायत सम्बन्धितलाई जिम्मेवार बनाउन, पुराना सवारी साधनको नियमन गर्न तथा सडक सुरक्षा र अनुशासनको कडाइका साथ पालना गर्ने विषयमा ठोस् कदम चाल्न बैठकले सरकारको गम्भीर ध्यानाकर्षण गरेको छ ।

सडक दुर्घटनाबाट ज्यान गुमाएका व्यक्तिप्रति श्रद्धाञ्जलि अर्पण, शोकाकुल परिवारप्रति समवेदना एवं राहत प्रदान गर्न र घाइतेको शीघ्र स्वास्थ्यलाभको कामना गर्दै बैठकले घाइतेको उपचारको प्रबन्ध गर्न र दुर्घटनामा अभिभावक गुमाएका बालबालिकाको शिक्षादीक्षा तथा जीवनयापनको व्यवस्था गर्न पनि माग गरेको छ ।

यसैगरी, तराईका विभिन्न जिल्लामा शुरु भएको शीतलहरले विपन्न वर्गका नागरिकलाई ठूलो समस्या एवं मर्कामा पारेको कुरालाई ध्यानमा राखेर विपन्नलाई न्यानो लुगा र दाउरा वितरण गर्न, घरबारबिहीनलाई जनता आवास कार्यक्रम अन्तर्गत आवास उपलब्ध गराउन तथा समस्याको दीर्घकालीन समाधान खोज्न बैठकले माग गरेको छ ।