पोखरा- पोखरा प्रिमियर लिग (पिपिएल) क्रिकेट प्रतियोगिता अन्तर्गत आजको खेलमा जित हात पार्दै बुटवल ब्लास्टर्स प्लेअफमा पुगेको छ।

बुटवलले एक्स्पर्ट धनगढी ब्लुजलाई ७ विकेटले हराउँदै प्लेअफमा स्थान पक्का गरेको हो। जितसँगै बुटवलले अन्तिम खेलअघि ६ अंक जोडेको छ।

लगातार ४ खेल जितेर ८ अंक जोडेको चितवन राइनोज यसअघि नै प्लेअफमा पुगिसकेको छ। धनगढीले दिएको १४१ रनको लक्ष्य बुटवलले ३ विकेटको क्षतिमा १६.४ ओभरमा पूरा गर्‍यो। बुटवलको जितमा अफ्तबुद्धिन अहमेदले ५२ रन जोड्दा हर्ष टोङ्कले ४० रनको योगदान दिए। बलिङमा धनगढीका अनिल खरेलले २ विकेट लिए।

त्यसअघि पहिले ब्याटिङ गरेको धनगढी १ बल बाँकी रहदा १४० रनमा अलआउट भयो। धनगढीका लागि दीपेन्द्रसिंह ऐरीले ६१ रन जोड्दा अन्य ब्याट्सम्यान सस्तैमा आउट भए।

बलिङमा बुटवलका अभिनास बोहराले ४ विकेट र ललित भण्डारीले ३ विकेट लिए।