मुम्बई – अभिनेत्री राधिका आप्टेले बलिउडमा मिटु मुभमेन्ट आएर गए पनि यसले खासै फरक नपारेको बताएकी छिन् । केही समयअघि भारतमा मात्र नभएर विश्वभर नै मिटु मुभमेन्टले छोएको थियो ।

यो मुभमेन्टबाट बलिउड पनि अछूतो रहन सकेको थिएन ।

बलिउडका महिला कलाकारले मिटु मुभमेन्टपछि कैयन् कलाकार, लेखक, सेलिब्रेटीलाई हिंसा गरेको आरोप लगाएका थिए ।

‘मिटू आन्दोलन आयो र गयो, यो निराशाजनक हो, यसले धेरै कुरा बदलिनुपर्ने थियो, त्यो बदिलिएन,’ आप्टेले भनिन्, ‘धेरै कुरा बाहिर आएनन्, न त आएका कुरा नै बदलिए ।’

उनले यो मुभमेन्ट वास्तवमै निराशाजनक रहेको धारणा राखिन् ।

आप्टेको बुझाइमा यो मुभमेन्टले भेदभावको विषयमा पनि कुनै परिवर्तन ल्याएन । उनले पारिश्रमिकको विषयमा पनि खुलेर आफ्नो धारणा राखिन् ।

आप्टेले पारिश्रमिकको हिसाबले पनि बलिउडमा समानता नभएको बताइन् । उनले भनिन्, ‘यहाँ पारिश्रमिकमा पनि समानता नै छैन, हामीले यसबारेमा कहिल्यै कुरा गर्दैनौँ ।’